По изјавата на обвинителката Вилма Русковска, на денешното судење за „27 април“ дека Груевски кукавички избегал кога требало да се соочи со правдата, на Фејсбук реагираше поранешниот премиер кој е во Будимпешта.
„Никогаш не сум избегал од соочување со правдата. До последен ден одев на судските рочишта и за тие кои одблиску и непристрасно го следеа процесот покажав и докажав дека ме судат без вина во очигледен политички прогон со политички монтиран процес и дека судот, исто како и обвинителството, е ставен во политички цели и работи со политички мотиви и инструкции.
Затоа кога веќе завршија и се исцрпеа сите можни начини за докажување на вистината, соочен со неправдата и пораките за линч кои ги добивав, одлучив да заминам од земјата и времено да се засолнам од налетот на политичкиот прогон врз мене.
Неправедно и незаслужено, без вина и со политички конструиран случај да треба да влезеш во затвор во кој ти се спрема ликвидација, не е воопшто соочување до правдата.
Како што не е бегање од правдата ако одбиеш да го прифатиш тоа“, пишува Груевски на Фејсбук.
