Владата во Атина ќе ги поднесе меморандумите за соработка со Македонија во Парламентот на ратификација само кога „националниот интерес и агендата на Парламентот ќе дозволат“, изјави министерот за надворешни работи Никос Дендијас.
Одговарајќи на прашање на пратеникот на ПАСОК-Движење за промени, Јоргос Каминис, Дендијас прифати дека има одложување со меморандумите, но рече дека постои „поширока перспектива на националните интереси, која секоја влада има право да ја усвои“.
Тој додаде дека меморандумите ќе бидат донесени на ратификација кога Владата ќе процени дека е целисходно да го стори тоа.
Во врска со Преспанскиот договор со северниот сосед, Дендијас рече дека премиерот има „јасен став“ оти „грчката влада нема опција да усвои ревизионистичка политика за договорите што [земјата] ги потпишала, без разлика на владите”.
Нова демократија се спротивстави на Договорот од Преспа кога во 2018 година беше договорен меѓу поранешните премиери Алексис Ципрас и Зоран Заев.
Владата на Нова Демократија го одложи потпишувањето на меморандумите за соработка во јуни 2021 година, тврдејќи дека Македонија не го спроведува договорот од Преспа за името на земјата во сите контексти.
Дендијас истакна дека Грција сè уште има прашања во врска со спроведувањето на договорот, но лично смета дека владата во Скопје прави напори наспроти „силните реакции од домашната опозиција“.
Каминис рече дека големото доцнење и молкот од страна на владата „не може да се оправда“, додавајќи дека влечењето на ова прашање не направи ништо за нејзиниот кредибилитет во странство и ѝ овозможи на Македонија да продолжи со непожелни дејствија во однос на имињата на брендовите и учебниците.
Тој ѝ го припиша доцнењето на проблемите на Владата, тврдејќи дека таа не може да обезбеди доволна поддршка меѓу своите пратеници за ратификација бидејќи ги претвори надворешнополитичките прашања во храна за популизмот и за ситни домашни политички цели.
