Автобусите на ЈСП почнуваат од попладнево да возат, со што практично ќе ја остварат третата смена до полноќ. Градоначалничката на Град Скопје Данела Арсовска им соопшти на вработените од ЈСП Скопје дека се изгласани субвенциите и им порача дека нема потреба да се грижат бидејќи ќе има ЈСП Скопје пари за плати. Таа немаше храброст да се поздрави со нив, туку од преку ограта им крена рака, исто како од кафез, без да направи два реда муабет со нив, кои мрзнеа пред бараките, чекајќи позитивни вести, односно епилог од маратонската седница во Градското Собрание.
Овој пресврт се случи откако беше изгласана одлуката за субвенции за цела 2024 година од 485 милиони денари, со 25 гласови „за“, без ниту еден глас воздржан и против. Возењето ќе се одвива непречено и ќе почне и утре рано наутро со прва смена од 04.45 часот.
Информацијата беше поздравена од 50-та вработени кои останаа до крај да дознаат дали утре платата за декември ќе легне на нивните сметки.
