Европскиот парламент денеска го усвои предлог на Европската комисија со кој се бара визна либерализација за косовските граѓани.
Комесарот на ЕУ, Димитрис Аврамопулос, рече дека е задоволен од фактот што Европскиот парламент ја препознал важноста за безвизниот режим за Косово.
„Не се работи само за признавање на нивните напори, туку и за обезбедување стабилност и безбедност во регионот. Тоа е европска перспектива на целиот регион“, вели тој.
Тој потсети дека во јули 2018 година Европската комисија потврди дека Косово ги исполни сите услови за визна либерализација, вклучувајќи ја и демаркацијата на границата со Црна Гора и зајакнувањето на борбата против организираниот криминал и корупцијата.
Известувачот за визна либерализација во Европскиот парламент, Тања Фајон, рече дека Косово останува „црна дупка во Западен Балкан“ кога станува збор за визите и ја повика ЕУ веднаш да реагира.
Некои членки на ЕУ не ја поддржуваат визната либерализација за Косово поради стравувањата од ризици од миграција и проблеми што ЕУ веќе ги има со приливот на баратели на азил од таа земја.
