Турција е благодарна на сите земји за помошта што ја дадоа во операциите за пребарување и спасување и напорите преземени по разорните земјотреси, изјави во вторник турскиот претседател Реџеп Таип Ердоган.
Ердоган во видео порака по повод Светскиот владин самит во Дубаи, Обединетите Арапски Емирати, рече дека спасувачките тимови досега извлекле живи над 8.000 луѓе од урнатините на зградите по земјотресот што во понеделникот минатата недела ја погоди јужна Турција.
Тој додаде дека голем број од над 81.000 повредени во земјотресите веќе се отпуштени од болниците.
„Би сакал уште еднаш да им се заблагодарам на сите пријателски и братски земји кои собираат помош за нашиот народ дење и ноќе, ги поддржуваат нашите напори за потрага и спасување со своите тимови и мислат на нас во нивните молитви“, рече Ердоган.
Во земјотресите на југот на Турција загинаа 31.974 лица, соопшти Дирекцијата за катастрофи и вонредни состојби (АФАД).
195.962 лица се евакуирани од подрачјето погодено од земјотресите.
АФАД соопшти дека по два разорни земјотреси, регистрирани се уште 3.170 помали земјотреси.
На терен работат 35.249 персонал и членови на различни институции од Турција и меѓународни спасувачки тимови.
На терен се 9.456 луѓе од други земји.
