Кристално јасно е и дека на референдумот немаше доволен број на граѓани кои би се изјасниле на поставеното прашање. И покрај сите полемики,, моето мислење е дека прашањето беше кристално јасно, напиша професорот по приватно меѓународно право и меѓународна трговска арбитража, Тони Дескоски.
„Сега, кога имаме неуспешен референдум , чувствувам потреба да укажам на една одредба од Преспанската спогодба, која во значителна мерка може да влијае на идните постапки. Имено, во чл. 2 став 4, точка б, алинеја ii (втора,трета и четврта реченица), изречно е пропишано дека поддршката на Грција за наше зачленување во НАТО е условено од исполнувањето на два кумулативни услови: прво, од исходот на референдумот (кој мора да е конзистентен со Спогодбата) и второ, усвојувањето на Уставните амандмани (четири на број). Тоа значи дека без исполнување на било кој од двата услови, Грција нема да има обврска да не поддржи за членство во НАТО. Тоа пак значи, дека дури и да ја ратификуваат Преспанската спогодба во нивниот парламент, ние ќе бидеме во нивна милост или немилост, за тоа дали ќе не пропуштат во НАТО. Грција секогаш ќе може да се повика на неуспешниот референдум, и совршено правно засновано да одбие да го ратификува протоколот за наше пристапување во НАТО. Тогаш, ниту Меѓународниот суд на правдата нема да пресуди за нас. Оттука, пред да се пристапи кон уставни измени, укажувам на опасноста со која се соочуваме, дури и ако амандманите бидат усвоени“, детаљно објаснува професорот Дескоски.
Тој појаснува и дека референдумот е даден како опција во спогодбата, но кога веќе ја одбравме да ја спроведеме, исходот на референдумот стана услов за Грција да ја ратификува спогодбата.
„Очигледно, целта на оваа одредба била да ја дестимулира нашата страна да спроведе референдум. Но, поентата е и да ги усвоиме уставните амандмани, повторно ќе зависиме од добрата воља на Грците. Замислете како Мицотакис ќе реагира на ваков пенал“, заклучува Дескоски.
