Во интервју за „Велт“, шефот за надворешна политика на ЕУ, Жозеп Борел, барањата на Русија за безбедносни гаранции и запирање на проширувањето на ЕУ и НАТО на исток ги нарече „чисто руска агенда со целосно неприфатливи услови“.
„Барањата за безбедносни гаранции и крај на проширувањето на ЕУ и НАТО на исток се чисто руска агенда со целосно неприфатливи услови, особено за Украина“, рече Борел.
Тој рече дека за прв пат Москва „ги изнесува своите барања во писмена форма – нешто што досега не се случило“. „Тоа го прават само победниците: тие велат – ова се моите услови“, рече Борел.
Во средината на декември руското Министерство за надворешни работи објави нацрти на договорот со САД и договорот со НАТО. Документите веќе се предадени на Вашингтон и неговите сојузници. Во една од клаузулите, Москва предложи земјите од НАТО да и дадат гаранции на Русија кои ќе спречат понатамошно проширување на исток, особено на украинска територија.
Рускиот претседател Владимир Путин постојано нагласува дека проширувањето на НАТО на исток и распоредувањето оружје во Украина се црвени линии за Москва.
