Еден куп граѓани беа непријатно изненадени кога од полициските служби во станиците за технички преглед им беа побарани 1.136 денари за издавање на нова сообраќајна дозвола со уставното име иако беше соопштено дека замената на возачките и сообраќајните дозволи нема да се наплаќа. На пазар пак, во некои дуќани и преку интернет можат да се купат налепници со кодот НМК, а во дел од станиците за технички преглед налепници нема.
„Го задолживме Министерството за внатрешни работи да ги преземе сите правни акти за да постапи, а тоа возачките и сообраќајни дозволи за сите граѓани коишто треба предвремено да се сменат да бидат без надомест“, рече вчера вицепремиерот Фатмир Битиќи.
Дополнителниот заменик-министер за внатрешни работи Митко Бојмацалиев рече дека од денеска на товар на МВР ќе се врши промена на возачките и сообраќајните дозволи со старото уставно име.
Граѓани пак, велат дека полициските службеници кои работат на шалтери во станиците за технички преглед издавањето на сообраќајни дозволи денеска го наплаќаат. На граѓаните кои потсетуваат на вчерашната најава дека тоа треба да е на товар на МВР, службениците им одговараат дека немаат таков допис од МВР. Некои граѓани платиле, некои револтирано си заминале дома без да извршат замена на сообраќајната дозвола.
Во меѓуреме преку социјалните мрежи се појавија огласи преку кои се продаваат налепници со НМК. Ги има и во некои приватни продавници. Наводно, ги задоволуваат стандардите според правилниците на МВР – флуоресцентна им е фолијата и се отпорни на надворешни влијанија. Каков е коментарот на МВР, дали ваквата продажба е нелегална и какви се евентуално санкциите за оние кои на своја рака ќе залепат таква налепница, одговор нема.
Без налепница на регистарската табличка со ваква „лепенка“ од денеска не може да се излезе со возило од земјава. МВР не ги наплаќа налепниците. Само треба да се отиде во станица за технички преглед каде што ги има, да се чека во ред и вработените потоа ги лепат налепниците, а тој „процес“ рекоа од МВР, се снима со камера.
