Американскиот претседател Џозеф Бајден ги прифати плановите за обука на украински пилоти да управуваат со американски авиони Ф-16, изјавиле две лица запознаени со ова прашање.
Бајден одобрението го даде во јапонскиот град Хирошима, за време на самитот на Групата 7 најразвиени земји, која разгледува начини да ѝ помогне на Украина во борбата против руската инвазија.
Според зборовите на двата извори, обуката на украинските пилоти најверојатно ќе се одвива во Европа во текот на следните месеци, објави АП.
Бајден им рече на лидерите на Г7 дека одлуките за тоа кога, во кој број и кој на Украина ќе ѝ даде авиони Ф-16 од четвртата генерација ќе бидат донесени во наредните месеци.
