Се чини дека Русија се подготвува да анектира два региони во источна Украина, а можеби и трет на југот на земјата, изјави во понеделникот висок американски дипломат, цитирајќи „многу веродостојни“ извештаи за плановите на Москва.
Мајкл Карпентер, американскиот амбасадор во Организацијата за безбедност и соработка во Европа, рече дека Кремљ најверојатно ќе организира „лажни“ избори на сепаратистичките територии Доњецк и Луганск поддржани од Русија во средината на мај за формално да ја преземе контролата над двете, јавува Њујорк тајмс.
Амбасадорот не сакаше да го прецизира потеклото на овие извештаи или како можел да даде такво предвидување.
Можно е да следи сличен референдум во Керсон, во јужна Украина, рече тој. Рускиот јазик е доминантен во сите три области.
Тој рече дека не е сигурно дека Русија на крајот ќе пристапи кон анексија на некој од регионите, а уште помалку ќе биде успешна во тоа, но дека „ова е планираното што го гледаме“.
Рускиот претседател Владимир Путин ја призна независноста на таканаречената Народна Република Доњецк и Народна Република Луганск неколку дена пред почетокот на руската инвазија на Украина кон крајот на февруари. Сепаратистите поддржани од Москва во регионите се борат против украинските сили од 2014 година.
Путин го анектираше Кримскиот Полуостров во 2014 година само неколку часа откако 97 отсто од гласачите на референдумот таму го одобрија отцепувањето од Украина. Гласањето беше критикувано како лажно, а голем дел од светот оттогаш одби да го признае Крим како дел од Руската Федерација.
