Грчкиот весник „Катимерини“ пишува дека Грција ја поставила првата пречка на евроинтергацискиот пат на Албанија со несогласувањето со заедничкото писмо на 27. земји-членки на Европската унија за првиот пакет поглавја од преговорите за членство на западниот сосед на Македонија.
„Одлуката на Грција да не се согласи со заедничкото писмо на 27-те земји-членки на Европската унија до Албанија за отворање на преговорите за првиот пакет поглавја за пристап претставува значителна ескалација на тврдиот став кон Тирана поради тековното кршење на правата на Фреди Белери, етнички Грк кој беше затворен непосредно пред да биде избран за градоначалник на Химара на локалните избори во соседната земја.
Иако беше пронајден начин за преговори за ова поглавје со Северна Македонија, бидејќи Бугарија се согласи на компромисот што го понуди шпанското претседателство, тоа не се однесуваше на Албанија.
Покрај влијанието што ставот на албанскиот премиер Еди Рама во случајот Белери го имаше врз грчко-албанските односи, овој развој ефективно ги раздвојува двете кампањи на Северна Македонија и Албанија, кои досега беа меѓусебно поврзани.
Првиот сет на фундаментални прашања што секоја земја-кандидат мора да ги реши се вклучени во пет поглавја кои се однесуваат на: судската власт и основните права; судството, слободата и безбедноста; јавни набавки; статистика; и финансиска контрола.
Пред само неколку дена беше објавен извештајот за напредокот на земјите-кандидати за Европската унија, со имплицитно, но јасно упатување на компликациите во грчко-албанските односи предизвикани од случајот со Белери.
Атина може да го преиспита својот став доколку Тирана преземе чекори за да сугерира дека има простор за дискусија. Атина на сите можни нивоа побара на Белери да му се даде можност да положи заклетва како градоначалник на Химара, што досега беше одбиено од албанските судови. Следната седница на корупцискиот суд, каде на Белери му се суди за купување гласови, ќе се одржи на 22 ноември, но во меѓувреме се очекува да биде закажано ново рочиште за специјалното отсуство кое го бара тој за да положи заклетва“, пишува „Катимерини“.
