Албанците за првпат се меѓу најчестите родители во Велика Британија родени во странство.
Повеќе од 3.000 бебиња се родени минатата година од мајки од оваа балканска земја, откри Канцеларијата за национална статистика (ОНС).
Но, бројките поттикнаа прашања за вистинската големина на албанското население во Обединетото Кралство, кое според официјалните бројки изнесува помалку од 50.000.
„Албанија за прв пат се најде во првите десет најчести земји на раѓање на мајките и на татковците што не се родени во Велика Британија“, соопшти ОНС.
Меѓу мајките, Албанија стана десетта најчеста земја, што е огромен скок во споредба со една деценија порано.
И меѓу татковците, таа стана осма најчеста земја, скок од 36. место пред една деценија.
„Необично е што има толку многу бебиња родени овде од родители Албанци, со оглед на официјалната статистика за нивниот број. Останува прашањето дали голем број Албанци се тука илегално или дали им се издаваат визи на некој друг начин и, ако е така, зошто“, изјави поранешниот министер за внатрешни работи, сер Џон Хејс.
Бројките на ОНС за 2019 година проценуваат дека има само 47.000 Албанци во Велика Британија, што ги прави 46. националност во земјата по бројност родена во странство, од кои 22.000 се жени.
Питер Волш од Опсерваторијата за миграција на Универзитетот во Оксфорд вели: „Достапните податоци за имиграцијата не даваат јасно објаснување зошто Албанија за прв пат се најде во првите десет најчести земји на раѓање за родители мигранти. Можните објаснувања за ова вклучуваат дека проценката на населението на ОНС е премногу ниска [на пример, поради неправилна миграција или слаб одговор на владините истражувања] или дека Албанците се со поголема веројатност да бидат во репродуктивна возраст и оттука да имаат повеќе деца“.
