ЕK: Нема датум без брза и ефикасна истрага за „Рекет“
Европската Комисија смета дека на македонските политички сили е да изнајдат договор за замената на Катица Јанева во согласност со законот.
„Воспоставувањето на Специјалното јавно обвинителство на с. Македонија беше дел од Договорот од Пржино помеѓу сите главни политички партии во земјата, вели за МИА, портпаролката на ЕК Маја Коцијанчич.
Таа потсетува дека Собранието го усвои законот со кој се етаблира СЈО и ја назначи Катица Јанева на функцијата специјална јавна обвинителка.
„Нејзиниот заменик или заменичка ќе биде назначен согласно релевантните закони на с. Македонија и Европската Унија немала и нема никаква улога во овој процес“, вели Коцијачнчич.
Европската Комисија не ги коментира јавно ниту деталите од преговорите помеѓу власта и опозицијата за иднината на СЈО, ниту случајот „Рекет“, но извори во оваа институција кои од блиску ги следат случувањата во Македонија, велат дека она што е најважно за Брисел како и за земјите членки на ЕУ, е брза, но ефикасна и транспарентна истрага.
„Фактот што Катица Јанева е искомпромитирана не мора нужно да значи дека целата институција е искомпромитирана“, сметаат во ЕК, но се разбира, велат, очекуваат истрагата за „Рекет“ да ги донесе потребните одговори на дилемите кои се појавија, на брз, ефикасен и транспарентен начин.
Од ова во голем дел ќе зависи и одлуката за датумот за преговори за Македонија која се очекува во октомври, потсетуваат во Брисел.
