Информациите дека постои можност пратеничката Елизабета Канческа-Милевска да не гласа за уставните измени засилени откако премиерот Заев ја спомена со име и презиме и рече дека не знае дали таа ќе гласа за уставните амандмани.
“Не знам за ниту еден пратеник. Пратеничката Елизабета Канческа Милевска е координатор на новата пратеничка група и таа е длабоко влезена во процесот на разговорите за сѐ. Работи буквално како нас во Владата, креаторите на амандманите. Знам дека знае за сите детали, секако одлуката ќе ја носи лично таа, нејзината пратеничка група, секој пратеник поединечно, па и вкупно сите 120 пратеници, па и очекуваните 80. Не можам да кажам дали без еден пратеник ќе има 80 или не. Не знам дали ќе бидат 80, дал 79, дали 82, дали 78. Никој тоа не може да го каже” изјави Заев кој останува оптимист дека ќе има доволно гласови за уставните измени.
“Верувам дека самиот процес на разговори кој тече дава можност да веруваме дека ќе се обезбедат најмалку 80 пратеници. Тоа е конечната цел и затоа дискутираме. Ако тоа не беше важно ќе одиме директно, ќе се гласа, ќе се донесат одлуките и на крајот ќе видиме дали има две третини или не. Лично верувам дека ќе се обезбеди. Останувам оптимист затоа што ги знам и оние причини кои сега се процес на дебата, тие не се од таква суштина за да загрозат ваков процес, но не е неважна. Мораме да бидеме внимателни за сите аспекти”, смета премиерот.
Предходно Билал Касами од БЕСА изјави дека ако не им се исполнат условите нивните двајца пратеници нема да гласаат за уставните промени.
