Посебниот советник за развој на мултикултурно општество, активист за човекови права и претседател на балканскиот сојуз на Египќани Рубин Земон смета дека ракометарот Стојанче Стоилов е ментално нестабилен.
Земон, кој бил присутен на настанот на Агенцијата за спорт и млади од која Стоилов си замина затоа што се зборувало на албански јазик, тврди дека вчера немало никаков скандал и дека еден од добитниците на спортските награди прво зборувал на мајчин јазик, а потоа продолжил на македонски.
Според сегашниот советник на премиерот, инаку ексракометар Земон, ракометната ѕвезда Стоилов морал да остане да му честита на годинешниот добитник на наградата „Спортист на годината“, што ја освоил самиот лани.
„Секој си има право да си говори на својот јазик. Човекот ги поздрави луѓето на албански, а потоа го стори истото и на македонски.
Тоа е негово право и никој не смее тоа да му го оспори, а најмалку Стојанче, а уште повеќе од тоа да се направи инцидент.
Тој прво мораше да остане до крај како ‘спортист на годината’ од лани и да му честита на овогодишниот спортист. Но, изгледа човекот е ментално нестабилен.
Јас како поранешен ракометар го гледам и на терен, во одбрана е ‘дупка’, најслабата алка, а тоа е баш одлика на ментално лабилни, неодговорни и егоцентрични играчи“, анализира советникот за мултикултура на премиерот Заев.
Експертот за мултикултура Рубин Земон, кој е член на низа меѓународни организации и институции на оваа тема, е лидер на партијата ПОЕН, која е во коалицијата предводена од СДСМ.
