Соединетите Американски Држави се обратија до Кина за да побараат разговори за царините од 145 проценти што ги воведе претседателот Доналд Трамп, а вратата на Пекинг е отворена за разговори, соопшти утрово кинеското Министерство за трговија, сигнализирајќи потенцијална деескалација во трговската војна.
САД треба да бидат подготвени да преземат мерки за да ги исправат „погрешните“ практики и да ги откажат едностраните царини, соопшти Министерството за трговија, додавајќи дека Вашингтон мора да покаже „искреност“ во преговорите.
„Обидот да се искористи разговорот како изговор за принуда и изнуда нема да функционира“, соопшти Министерството за трговија.
Пекинг отворено го изрази својот гнев поради царините, за кои вели дека не можат да го запрат подемот на втората по големина економија во светот.
Кина, исто така, тивко создаде список на американски производи што ќе ги исклучи од својата одмазда од 125 проценти, вклучувајќи одбрани фармацевтски производи, микрочипови и млазни мотори, објави Ројтерс.
Од американска страна, претставници, меѓу кои и секретарот за финансии Скот Бесент и економскиот советник на Белата куќа Кевин Хасет, исто така изразија надеж за напредок во ублажувањето на трговските тензии.
Кина сака да се сретне и да разговара за трговија, а разговорите ќе следат наскоро, изјави синоќа американскиот државен секретар Марко Рубио за „Фокс њуз“.
Трамп завчера изјави дека верува оти постои „многу голема шанса“ неговата администрација да постигне договор со Кина.
Тој ги даде коментарите неколку часа откако кинескиот претседател Си Џинпинг ги повика официјалните лица да преземат мерки за прилагодување кон промените во меѓународното опкружување, без конкретно да ги спомене САД.
