Како дел од напорите за изнаоѓање дипломатско решение за конфликтот во Украина, Москва и Вашингтон планираат втор состанок во рок од две недели, објави руската државна новинска агенција РИА Новости, повикувајќи се на заменик-министер за надворешни работи на Русија, Сергеј Рјабков, пренесува Ројтерс.
Според него, средбата ќе се одржи во трета земја, а за конкретното место во моментов се преговара.
Првата средба меѓу претставниците на двете земји се одржа на 18 февруари во главниот град на Саудиска Арабија, Ријад, а Кремљ ја опиша како „многу, многу важен чекор“ кон решавање на војната во Украина. Разговорите главно се фокусираа на билатералните односи меѓу Москва и Вашингтон.
Рјабков нагласи дека постои „начелен договор“ за одржување консултации за „целиот блок таканаречени иританти“ во руско-американските односи. Покрај тоа, тој ја изрази можноста за дијалог за стратешка стабилност и контрола на вооружувањето, но нагласи дека тоа ќе стане возможно дури откако Москва ќе воспостави „видливи подобрувања во американската политика“.
Во меѓувреме, Кремљ потврди дека ја разгледува можноста за лична средба меѓу рускиот претседател Владимир Путин и неговиот американски колега Доналд Трамп веќе овој месец. И двајцата лидери веќе изразија желба за ваков разговор.
Трамп: Зеленски нема адути во ракавот да преговара со Русија
