Северна Кореја ќе ја поддржува Русија во војната во Украина онолку долго колку што е потребно, порача министерката за надворешни работи Чое Сон Хуи, додавајќи дека Пјонгјанг не се сомнева оти Москва ќе излезе како победник.
Говорејќи на денешната средба со нејзиниот руски колега Сергеј Лавров, Чое истакна дека севернокорејскиот лидер Ким Џонг-ун „ни даде наредба цврсто и моќно да ги поддржиме и да им помагаме на руската армија и на рускиот народ во нивната света војна“.
Според министерката, Северна Кореја не се сомнева дека под водство на претседателот Владимир Путин „руската армија и народ ќе постигнат голема победа во својата борба за заштита на нивните суверени права и безбедносни интереси“. „Потврдуваме дека секогаш цврсто ќе стоиме на страната на нашите руски соборци до денот на победата“, рече таа.
Чое, исто така, истакна дека Русија и Северна Кореја ги развиваат односите во сите сфери, вклучувајќи ја и одбраната, врз основа на историскиот Договор за сеопфатно стратешко партнерство што Москва и Пјонгјанг го потпишаа во јуни. Двете земји сега се впуштаат во мисијата за „понатамошна координација на нашата надворешнополитичка позиција… и уште повеќе да ги унапредат нашите интеракции во сите области, како и заеднички и ефективно да одговорат на сите меѓународни прашања на сите меѓународни платформи“, рече таа.
Во меѓувреме, Лавров ги промовираше и билатералните односи, велејќи дека тие достигнале „невидено високо ниво“. Тој му се заблагодари на Пјонгјанг за „принципиелниот став за настаните во Украина“, за кои рече дека се резултат на проширувањето на НАТО и на кампањата за охрабрување на Киев да „избрише сè што е руско“ во земјата.
Договорот меѓу Северна Кореја и Русија, кој беше ратификуван од руските пратеници минатата недела, предвидува дека ако едната страна биде нападната, другата „ќе обезбеди воена и друга помош со сите средства што ги поседува без одлагање“.
Украина и западните земји ја обвинија Северна Кореја дека испраќа војници во Русија и се загрижени дека тие на крајот може да се приклучат на конфликтот. Северна Кореја ги отфрли обвинувањата, велејќи дека тие се обид да се наруши имиџот на Пјонгјанг. Путин ниту ги потврди ниту ги демантираше овие тврдења, додавајќи дека деталите за соработката меѓу двете земји не се ничија работа.
