„Изминаа 20 дена од скандалозното признание на вината и од спогодбата меѓу членот на Советот на јавни обвинители Иџет Мехмети и Ислам Абази, двајцата првенци на ДУИ. Изминаа 15 дена откако прашуваме каде е Дрин Ахмети и дали е точно дека одамна е спроведен надвор од државата. Изминаа 3 дена откако објавивме дека претседателот на огранокот на Села во Боговиње е уапсен за профитирање од криминални коцкарници преку интернет.“ – објави коалицијата Вреди во своето соопштение.
Натаму, коалицијата Вреди истакнува: Од сите страни пристигнуваат информации и докази за скандали од различни институции, поврзани со кадрите на минатата Влада. Се однесувале дословно како да бил државниот буџет приватно чекмеџе, кое треба да ја задоволува нивната алчност. Ахмети и Села упорно молчат, и наместо да се извинат, најавуваат посети на нивните ограноци. Изгледа дека го храбрат членството со нова порција лаги – дека час поскоро ќе се вратат на власт.
Продолжува нивното политичко слепило, со што се обидуваат да ги направат Албанците штит за политичката корупција на нивните првенци, кои сакаат да уживаат во нелегално стекнатиот имот. Ова раководство на ДУИ уште е заглавено во минатото од пред 15 години кога Албанците се уште им веруваа дека навистина се борат за нивните права. Времето на тие заблуди одамна заврши.
Допрва ќе почне да се одмотува клопчето, кое ќе ги разоткрива вистинските лица на политичките богаташи чија единствена цел било безмилосно да се граба од народните ресурси. Бидејќи Ахмети и Села упорно ја игнорираат пораката на албанските гласачи од 8-ми мај, ќе добијат уште погласна и појасна порака на локалните избори следната година.
