„Матно – бистро“, месечниот барометар на коруптивни однесувања и на борбата со корупцијата на Транспаренси интернешнл-Македонија на врвот на матни настани го стави случајот со сомнежите за поткуп на врховниот судија Наќе Георгиев и заменик претседателот на Советот на јавни обвинители Иџет Мемети. Следуваат случаите со Академијата за судии и јавни обвинители, потоа распределбата на спортски ваучери и неспојливоста на владината со пратеничката функција.
Во матните настани Транспаренси интернешнл Македонија ја третира како првостепен случај истрагата против врховен судија и против член на Советот на обвинители под истрага за примање поткуп.
„Активен врховен судија е уапсен поради примање поткуп, а претрес е извршен и во канцеларијата на член на Советот на јавни обвинители поради поврзаност со истото дело. Судија на претходна постапка при Основниот кривичен суд Скопје му одреди 30 дена притвор на врховниот судија Наќе Георгиев, откако тој беше уапсен поради наводно примање поткуп од 10.000 евра, односно за делото примање награда за противзаконито влијание. Сомнежите се дека Иџет Мемети заедно со Наќе Горгиев имал влијание злоупотребувајќи ја позицијата член на Советот на јавни обвинители во случајот барање на мито за олеснителни околности за ексградоначалникот на Ново Село, Боро Стојчев, познат како Боро Марлборо“, пишува во извештајот.
Транспаренси интернешнл Македонија како второрангиран случај наведува дека Државната комисија за спречување на корупција – ДКСК покрена иницијатива за утврдувањне одговорност за директорката и за Управниот одбор на Академијата за судии и јавни обвинители.
Линк до целиот текст: https://mkd.mk/sluchajot-so-sudijata-georgiev-i-chlenot-na-sjo-memeti-na-vrvot-na-barometarot-na-korupcija/
