Обединетите нации (ОН) предупредија дека директната инвазија на пренаселениот јужен град Рафах во Појасот Газа ризикува да доведе до катастрофа од „епски“ размери.



Денеска Израел продолжи да изведува воздушни напади врз Газа откако ја прошири наредбата за евакуација на Рафах на југот на Газа, пренесе АФП.

Генералниот секретар на ОН Антонио Гутереш повика на итен прекин на војната меѓу Израел и Хамас во Газа, враќање на заложниците и испорака на хуманитарна помош на опколената палестинска територија.

„Го повторувам мојот повик, повикот на светот за итен хуманитарен прекин на огнот, безусловно ослободување на сите заложници и поголема испорака на хуманитарна помош“, рече Гутереш во видео обраќањето на меѓународната донаторска конференција во Кувајт на 12 мај.

„Но, прекинот на огнот ќе биде само почеток. Тоа ќе биде долг пат назад од уништувањето и траумата на оваа војна“, додаде тој.

Очевидци изјавија за АФП дека Израел извршил воздушни напади во Рафах, а сликите на АФП покажуваат дека чад се издига над градот.

Израел ја продолжи наредбата за евакуација за источен Рафах, откако властите во земјата соопштија дека 300.000 луѓе го напуштиле градот откако армијата ги повика луѓето да го напуштат претходно оваа недела.

АФП известува дека жителите на Рафа товарале резервоари со вода, душеци и други предмети во возилата како подготовка за нивното бегство.

„Не знаеме каде да одиме. Нема место во Газа што е безбедно или не преполно“, изјави за АФП Фарид Абу Еида, кој се подготвуваше да го напушти Рафах откако беше раселен од градот Газа.

Портпаролот на израелската армија Даниел Хагари изјави дека армијата „елиминирала десетици терористи во источниот дел на Рафах“.

Шефот на ОН Антонио Гутереш на 10 мај изјави дека Газа ризикува „епска хуманитарна катастрофа“ доколку Израел започне целосна копнена операција во Рафах.

Шефот на ЕУ, Шарл Мишел, на социјалните мрежи рече дека на цивилите од Рафах им било наредено да одат во „небезбедни зони“, осудувајќи го тоа како „неприфатливо“.

Лекари без граници (MSF) соопштија дека почнале да префрлаат 22 пациенти од полската болница во Рафах, велејќи дека операциите на Израел во градот „го оневозможуваат обезбедувањето медицинска помош за спасување животи“.

Повеќе од 1,4 милиони Палестинци, или половина од населението на Газа, побараа засолниште во Рафах бегајќи од израелската офанзива на северот на Појасот Газа.

Рафа се смета за последно прибежиште во Појасот Газа, а новите наредби за евакуација ги принудуваат жителите да се вратат на северот, кој е уништен од израелските напади од почетокот на војната во октомври 2023 година.