Фондацијата „Македонија“ од Бугарија, чиј претседател Виктор Стојанов има забрана за влез во земјава на неодредено време, сака да го преземе македонскиот фудбалски второлигаш Тетекс и да го искористи за бугарската кауза во државава.
„Македонскиот тим Тетекс од Тетово загуби катастрофално со 0:7 од албанскиот тим Беса. Голема е веројатноста Тетекс за следната сезона да испадне во Третата македонска лига Запад. Тимот нема пари за плати. Сега е време да го земеме и да го направиме носител на бугарската култура во Македонија“, ги објави Фондацијата своите намери на Фејсбук.
Две кола до крајот на Втората лига „штофарите“ се трети одзади на табелата и ако останат на таа позиција ќе играат бараж за опстанок.
Тетекс е двократен освојувач на Купот на Македонија, а во сезоната 1981/82 настапуваше и во Првата сојузна фудбалска лига на некогашна СФР Југославија.
