Лидерот на ВМРО-ДПМНЕ, одговори на заканата на Али Ахмети, кој вчера од митингот во Скопје му порача на Мицкоски „да не ја бара бељата и да ги бира зборовите“ откако Христијан Мицкоски ја повика албанската опозиција на обединување против власта…
„Уште истиот ден се јави Али Ахмети, нервозно одговарајќи, прозивајќи ме со навреди и доза на закани, но треба да знае дека неговите закани не само што не ме заплашуваат, туку и добро ме засмејуваат. Заканите доаѓаат од човек пред политичка пензија, помалку и заборавен, но сепак со добро грло, кое го вежба пеејќи по државни институции, и партиски прослави“ – напиша во објава на социјалните мрежи Мицкоски.
„Важен му бил на Али мојот оброк од детството, хммм…, чудно па се обидува заканите преку вицови да ги испрати. Ќе му одговорам! Мојот оброк Али во детството го печалеа моите родители со многу љубов и жртва да ме израснат и воспитаат во личност која ќе почитува и ќе се бори за својата Македонија. Но што е важно? Важно е Али да дадеш одговор со што ги хранеше твоите, па денес голобради момчиња печалат милиони, ја купуваат Соравија, или пак како го спечали тој дворец во Зајас кој е како на некој блискоисточен шеик, а не политичар од сиромашната Македонија“, пишува Мицкоски.
Тој истакна дека ја разбира нервозата и паниката бидејќи за првпат биле прочитани и пред пораз.
Мицкоски нагласи дека доаѓа времето за одговори на многу прашања. Порача дека ова не е 2001-ва, туку 2024-та, 23 години потоа, а ДУИ го претвори во криминална организација од која страдаат и Албанците и Македонците.
„Многу брзо од денес и кексито и млекото ќе ти преседнат…, му порача Мицкоски на Ахмети.
