Техничкиот министер за внатрешни работи Панче Тошковски јавно поставува дилема дали намерно 6-7 години Оливер Спасовски ги оставил нефункционални термалните камери на северната граница со цел никој да не може да се бори со криминалот и шверцот.
Термалните камери кои што треба да бидат главниот безбедносен систем на граничните премини на Македонија не работат, откри очигледно вознемирениот и емотивен технички министер за внатрешни работи, Панче Тошковски во вчерашното гостување во емисијата „Заспиј ако можеш“ на Телевизија Алфа.
„Ај што кубурат со човечки ресурси полициските станици на граничните премини, таму термалните камери не им работат и ова е сериозна работа којашто треба да не загрижи сите. Термалните камери ги имале на неколку пункта, а опсегот е значително голем и може да констатираат движење на како што ми беше кажано од еден од началниците таму, глушец да помине ќе го детектира или пак можеме по физикус и локалните жители да ги препознаеме, посочи началникот. Јас се прашувам дали намерно го правеле ова цело време за да помогнат на шверцот, не за да одмогнат“, изјави министерот Тошковски.
Според наводите на Тошковски, најмалку 6 години не функционираат скапите термални камери а таа информација министерот ја добил за време на посетата на овие локации од командирите на северната граница на Македонија.
„Системот е уништен, систем нема и ова се страшни факти кои што беа посочени до мене. Говорам за тоа што го констатирав со свои очи на северната граница, доколку не е така нека излезат и нека ме побијат со факти. Нека кажат дека има доволно човечки капацитети, нека кажат дека има доволно возила. И да не биде само ова, имаме друга полициска станица Јагуновце, немаат ниту еден компјутер за работење. Имаат само еден компјутер за безбедносните камери и истиот го користат и за изготвување на документи. Од пет полициски станици кои што ги посетив на граничните премини, само една била посетена од министер за внатрешни работи и тоа во 2016 година“, изјави Тошковски на Заспиј ако можеш.
Репризата на емисијата е денеска на ТВ Алфа во 15 часот.
