Македонскиот атлетичар Андреас Трајковски го освои 12. место во скок во далечина на Светското првенство во сала што се одржува од 1 до 3 март во Глазгов.
Единствениот претставник на Македонија на мундијалот својот најдолг скок од 7,73 метри го оствари во втората серија, 6 сантиметри покус од неговиот и македонски рекорд во сала што го постави на Балканијадата во Истанбул минатиот месец. Во првата серија тој прескокна 7,55 м, а во третата 7,51 м.
Седум сантиметри го делеа од осмото место на Швеѓанецот Монтлер, кое ќе му донесеше настап во финалето и уште три обиди. Деветтопласираниот Кинез Ванг, пак, имаше подобар скок од само еден сантиметар од Трајковски.
Четири атлетичари останаа зад 30-годишникот роден во Копенхаген, чиј татко Христијан Трајковски бил дански шампион на 100 и 200 м.
Андреас се натпреварува под знамето на Македонија од 8 февруари 2022 година и е сопственик и на државниот рекорд во скок во далечина на отворено од 7,91 м остварен минатата година. Следни предизвици за него се Европското првенство во Рим и Олимписките игри во Париз.
Светското злато во Глазгов го одбрани Гркот Тентоглу со 8,22 м, сребрениот медал го освои Италијанецот Фурлани со ист резултат, но послаба серија скокови, а бронзата му припадна на Јамајчанецот Мекледо со 8,21 м.
