Професорката од Институтот за правни и политичко-правни истражувања, Мирјана Најчевска, предупредува дека евентуалното прифаќање на иницијативата за избор на претседател на државата во Собранието значи губење на шансата Македонија да се гради како граѓанска држава.
Цуцуловски: Бесмислен е избор на шеф на државата во Собрание при постоење на „бадентер“
„ Евентуалното спроведување на идејата за избор на претседател во Собранието, првенствено бара суштинска промена на Уставот на Македонија, според кој е дефинирана како унитарна држава“, вели Најчевска во изјава за Нова Македонија.
„Ваквата иницијатива води кон предефинирање во бинационална држава, што значи губење на мултиетничкиот карактер на општеството.
Уште повеќе, тоа би значело дека би ја изгубиле шансата за градење граѓанска демократска држава.
Граѓаните како индивидуи, слободни личности во општеството ќе бидат принудени да се изјаснуваат етнички. Она што ги карактеризира демократските држави е етницитетот да биде во сферата на приватните работи на граѓаните, а не да доминира во јавниот сегмент. Наметнувањето на етницитетот во јавниот сегмент на државата и општеството води до загрозување на основните човекови права на граѓаните и секако е суштински чекор назад во демократијата.
Реализацијата на идејата за избор на претседател на државата во Собрание би било озаконување на партократијата, владеењето на партиите, спакувано во етничка обланда – вели професорката Мирјана Најчевска.
