Министерствата за здравство и информатичко општество добија нови министри од Алијанса за Албанците, од крилото на Села. Собранието денеска со 63 гласа „За“ ги избра Илир Демири за министер за здравство и Наим Бајрами за министер информатичко општество и администрација од редовите на Алијанса за Албанците. Тие доаѓаат на местото на нивните сопартијци Фатмир Меџити и Азир Алиу кои во петокот беа разрешени на предлог на техничкиот премиер Талат Џафери, откако минатата недела се случи внатрепартиски раскол околу настапот на претстојните парламентарни избори.
Разрешените министри се од крилото на претседателот на партијата Арбен Таравари, кој сака Алијанса за Албанците да коалицира со опозициските албански партии, додека новите двајца министри, како и министерот за правда Кренар Лога се од крилото на поранешниот претседател Зијадин Села, кој е за самостоен настап на изборите.
Додека опозицијата обвинуваше, власта молчеше. Техничкиот премиер, Талат Џафери само ги претстави на кратко новите министри- Демири како познат доктор кој сите го знаат, а Бајрами како млад и способен информатичар. Веднаш по изборот, Демири и Бајрами дадоа свечени изјави. Опозицијата не беше во салата.
