Избори се ближат, а власта ветува покачување на платите. Синдикатите алрмираат дека животниот стандард опаѓа, со трошоци кои ги надминуваат приходите на граѓаните. Граѓаните нема ден, а да не реагираат дека цените се толку високи што платите и пензиите се доволни само да можат да преживеат. Најново во низата е што, вредноста на синдикалната минимална кошница за јануари 2024 година изнесува 57.163 денари, соопшти Сојузот на синдикатите на Македонија. Во однос на онаа од претходниот месец која изнесуваше 56.522 денари, јануарската кошница е зголемена за 641 денар.
Истите работи кои во истиов период лани чинеле определен износ, сега чинат илјада, па и повеќе денари повеќе, покажуваат податоците на Државниот завод за статистика.
Па така, со изнајмен стан од 60 квадрати, минимална кошница за јануари изнесува 72.538 денари што е 566 денари повеќе споредено со декември 2023 година кога изнесуваше 71 972 денара. Исто се ова како да е ставено на брза лента.
Според ССМ, од кошницата, на храна и пијалаци отпаѓаат 21.007 денари или 36,7 отсто, на облека и обувки 4.803 денари или 8,4 проценти, на станарина, вода, електрична енергија и греење 6.014 денари или 10,5 отсто, на лична хигиена и оддржување хигиена во домот 1.797 денари или 3,1 отсто, на здравје 1.115 денари или 2 отсто, на транспорт 4.759 денари или 8,3 проценти, на комуникации 2.709 денари или 4,7 отсто, на рекреација и култура 4.205 денари или 7,4 проценти, на образование 7.022 денари или 12,3 отсто, на ресторани и хотели 3.733 денари или 6,5 отсто и на останати стоки и услуги 950 денари или 1,7 проценти.
Пензионерите и вработените во администрацијата по кој знае кој пат протестираа поради ниските плати и пензии, а незадоволството кај нив особено се зголеми откако функционерите своите плати ги зголемија за 78 отсто.
