Македонската заедница во Германија реагира пречестата употреба на придавката „северномакедонски“.
На ракометното европско првенство кое се одржува во Германија, ние сме во група со домаќинот, па нашето име постојано е дел од спортските вести во германските медиуми.
Како и во многу други земји, преспанскиот договор во делот кој задира во нашиот идентитет не се почитува. По промената на името тешко е да се едуцираат другите земји да ги користат термините Македонци и македонски, наместо Северномакедонци и северномакедонски.
Почесниот конзул во Диселдорф, Холгер Арндт и Гоце Перовски, претседателот на Советот за интеграција во овој град, испратија едукативен протест до германските медиуми, вклучително и телвизијата РТЛ која го пренесува Европското првенство. Истовремено апелираа до нашите Македонци во Германија, ова писмо да го испратат во што е можно повеќе институции во земјата, со цел никогаш повеќе да не се користат термините „северномакедонски“ и „Северномакедонци“.
