Путин засекогаш ја загуби Украина, изјави генералниот секретар на НАТО, Јенс Столтенберг.
Тој рече дека рускиот претседател Владимир Путин нема да може да ги постигне своите воени цели и покрај огромните воени напори по инвазијата во февруари минатата година.
„Целта на оваа инвазија беше да се спречи Украина да се движи кон НАТО и Европската унија. Украина сега е поблиску до НАТО и Европската унија од кога било досега. Ова е голем стратешки пораз за Русија. Претседателот Путин засекогаш ја загуби Украина“, рече Столтенберг во интервју за ДПА.
Тој е сигурен дека Украина на крајот ќе ја постигне целта за влез во НАТО. Тој, исто така, истакна дека Русија плаќа енормно висока цена за својата војна.
