„Македонското граѓанче секогаш ја запоставува својата држава. Денес сме изложени на сериозни психолошки операции против нашата држава и граѓани како дел од хибридните закани. Стремежот да се изолира земјава преку неусвојување на уставните измени и прекинување на преговорите со ЕУ се пресекува преку поттикнување внатрешномакедонски судир и меѓуетнички македонско-албански судир. ‘Имаат ли ум во нивниот десничарски мозок? Десничарскиот екстремизам не е болест на паметот, но е се уште предизвик за психијатријата’. Во ваква сложена глобална безбедносна состојба ние немаме минимум капацитет да разбереме каде сме, што сме и што сакаме!“ – вели Ана Чупеска, доктор по политички науки и професор во Правниот факултет „Јустинијан Први“, но и членка на владината „Комисија за промена на Уставот“, во својата скандалозна колумна со наслов „Психо операции“, која ја објави информативниот портал „Либертас“.
Покрај другото, Чупеска пишува: „Ние граѓаниве на нашава земја ‘Папокот на светот” или “Анусот на Европа”, имаме некои многу посебни поларизирачки тенденции и дилеми: Русија или Америка, Европа или БРИКС, СДСМ или ВМРО, Албанци или Македонци; патриоти и предавници. Само црно, или само бело?! Нема сиво, нема нијанси за нас.“
„Плукачите на комунизмот навиваат за Путин денес. Довчерашните ‘бугарофили’ се против Бугарите денес. ‘Борците’ за дискредитација на Блаже Конески и неговиот придонес во кодификацијата на македонскиот јазик го бранат ‘македонскиот идентитет’ до последната капка крв. Зборуваат за обесправен народ?! Кој кого заебава овде? Се знае кој.“
Потоа, споменувајќи некакви “конзервативни’ диспозиции и вредности врзани за свеста на поединците, кои така се идентификуваат“, Чупеска посочува на наслов на некој научен труд во смисловен превод на македонски јазик: „Имаат ли ум во нивниот десничарски мозок? Десничарскиот екстремизам не е болест на паметот, но е се уште предизвик за психијатријата“. Таа не ги споменува директно ВМРО ДПМНЕ како партија и нејзиното членство, но е сосема е јасно кои прашува „имаат ли ум во нивниот десничарски мозок“ и за кого смета дека е „предизвик за психијатријата“. Сосема е јасно кому и зошто му ги упатува тие исклучително тешки навреди оваа професорка-политиколог од Правниот факултет во Скопје.
За да нема дилема во овој поглед веднаш говорат и следниве реченици од колумната на авторката: „Стремежот да се изолира земјава преку неусвојување на уставните измени и прекинување на преговорите со ЕУ се пресекува преку поттикнување внатрешномакедонски судир и меѓуетнички македонско-албански судир. А ние, пустите поларизирани, глупантропи!“
Натаму, Чупеска „констатира“: „Не сум сигурна дека политичарите и медиумите се целосно свесни во каква бездна може да не однесе нивното неодговорно постапување, кое нема никакви допирни точки со државните и општествените придобивки, напротив во голема мера ги зголемува безбедносните ризици, на кои сме изложени.“
