Вицепремиерот за економски прашања Фатмир Битиќи најави дека конечно ќе се изнајде законско решение за платите кои Уставен суд им ги покачи на функционерите за 78%, ама сепак оваа точка не се најде на дневен ред на владината седница, а ниту вицепрмеиерот не е достапен да ги објасни причините. Како ќе биде уредено прашањето за платите на функционерите и колку тие ќе се намалат, Битиќи детали не откри, но рече дека парите што ќе се заштедат ќе одат за антикризните мерки.
- – Од 72.000 отидовме на 128.000. Минатата недела Владата донесе одлука и не задолжи работна група од четири министри за нови антикризни мерки. Утре ќе дадеме и законско решение за Законот за плати на избрани и именувани лица, за поправедено решение, со кое ќе ослободиме дел од средствата за антикризни мерки за најранливите катерогии, бидејќи тоа е клучно во временски периоди кога сите треба да покажеме солидарност, најави синоќа Битиќи.
Уставниот суд одлуката за покачување на платите за 78% на 1.060 функционери ја донесе на 21 март годинава, а оттогаш, токму оние на кои им се покачи платата дадоа бројни ветувања дека во најбрз рок ќе се изготви законско-решение за да се регулираат платите, но речиси 7 месеци подоцна нема никаква промена.
Плата од 166.000 денари зема претседателот на собранието Талат Џафери, додека пак шефот на државата – Пендаровски зема пониска плата од него за 1.500 денари. Трет на листата се најде премиерот чија плата изнесува 156.000 денари.
