Изгаснат е пожарот што избувна денеска околу 13 часот во галијата на Вардар кај хотелот „Холидеј Ин“ во Скопје. Нема повредени лица, а причината ќе се утврдува дополнително. Останува нејасно кој и кога ја запали галијата на кејот на Вардар во центарот на Скопје?!
- – Со брзата интервенција на три противпожарни екипи на Противпожарната бригада на Град Скопје е изгаснат пожарот во галијата. Засега причината е непозната, но нема довод на електрична енергија, а има поголема количина на смет, причината е најверојатно човечки фактор, истакна командантот на противпожарната бригада, Звонко Томески.
Дојавата за пожар во една од галиите на Вардар ја добиле во 13:01 часот и испратиле три противпожарни возила.
- – Пристигнати се во 13:05, интервенирано е брзо, спречено е проширување на пожарот кој имаше зафатено дел од Галијата, односно надворешниот дел од предниот дел и внатрешно, каде што имаше депонирано поголема количина на смет. Интервенирано е брзо, пожарот е брзо ставен под контрола, истакна Томески во изјава за медиумите.
Додаде дека причината ќе ја констатираат другите служби но она што е видливо на самата галија е дека има поголема количина на смет и најверојатно престојувале лица кои биле во близина на самата галија.
Ова не е првпат галијата да биде опожарена. Кусо откако Град Скопје во 2021 година почна да ја урива, пожар изби во нејзината внатрешност, а пожар имаше и во март годинава.
