Основното јавно обвинителство покренува постапка против 20 лица за криумчарење луксузни возила чија вкупна вредност е околу 500.000 евра.
Пет од лицата за кои се покренува истражната постапка се вработени во Министерството за внатрешни работи.
„Основно јавно обвинителство Скопје отвори истражна постапка за кривично дело Криумчарење, прикривање на стоки кои се предмет на криумчарење и царинска измама, компјутерски фалсификат и фалсификување исправи, но и прикривање на предмети поврзани со криумчарње и дури и злоупореба на лични податоци“, соопшти Наташа Сарамандова, јавен обвинител.
Иако е отворена постапка против осум лица, кривичната пријава е за 20 физички лица и едно правно лице. Се работи за криумчарење на луксузни возила чија вредност е околу 500.000 до 600.000 евра. Овие 15 возила, 14 автомобили и еден мотоцикл биле предмет на кривично дело во други европски држави и предмет на меѓународна потрага и потоа се внесувани со криумчарење, а се прават и фалсификати на исправи за нивно легализирање.
Делото се прикривало така што се продаваат неколку пати за пониска цена се додека не се најде вистински купец и се продаде по реална цена – истакна обвинителката Наташа Сарамандова, пренесе А1.он.
„Во моментов се лишени од слобода 18 лица, додека две лица се во бегство“, објасни обвинителката.
