Улични немири го потресоа париското предградие Нантер, откако полицаец застрела 17-годишно момче за време на сообраќајна контрола.
Гневната толпа запали канти за ѓубре, автомобили и основно училиште, а работниците од итната помош беа гаѓани со голема количина пиротехнички средства, соопштија градските власти.
Демонстрантите подигнаа барикади меѓу катните згради и ги попречуваа пожарникарите во нивната интервенција. Немирите почнаа синоќа со протести пред полициската станица во Нантер и се проширија во соседните градови.
Во Мант-ла-Жоли беше запалено градското собрание. Полицијата употреби солзавец и гумени куршуми, но мораше да се повлече. Според властите, уапсени се 15 лица.
Нередите биле предизвикани од смртта на 17-годишно момче вчераутро при полициска контрола. Снимката на мобилен телефон на сведок од инцидентот, потврдена од Франс Инфо, покажува како полицаец вперува пиштол кон возачката врата на запрен автомобил. Кога младиот човек зад воланот ненадејно излетал, полицаецот пукал од непосредна близина и смртно го ранил.
Франс Инфо објави дека полицаецот бил приведен под сомнение за убиство од небрежност.
Министерот за внатрешни работи Џералд Дарманин рече дека полицијата започнала внатрешна истрага за инцидентот. Убиството предизвика бес во Франција и обвинувања за прекумерно полициско насилство.
Ниту еден полицаец нема право да убива освен во самоодбрана, напиша на Твитер левичарскиот политичар Жан-Лук Меланшон. Тој рече дека полицијата ја омаловажува државната власт и дека таа треба темелно да се реформира.
