Кривичниот совет при Основниот кривичен суд го одби барањето за привремено враќање на патната исправа и на тој начин го оневозможи присуството на Др Жан Митрев на важен конгрес во Франкфурт каде беше поканет да одржи предавање.
Ова не е првпат да се одбие барањето на д-р Митрев за привремено враќање на патната исправа. Првиот пат беше одбиен да присуствува на семеен настан што се случува само еднаш во животот“, велат од неговата Клиника.
„Одбивањето на Судот да му дозволи присуство на светски конгрес каде е единствен доктор од регионот е загуба за македонското здравство да се претстават напредни методи во медицината. CSI Франкфурт (Congenital & Structural Interventions) конгресот е место каде присуствуваат најголемите експерти во хибридните процедури и ги споделуваат знаења и достигнувања во примена на иновативни техники во катетерската терапија на срцеви заболувања.
Доктор Митрев беше поканет како единствен доктор да ја претставува Македонија и регионот, со цел да ја презентира успешната примена на хибридна процедура кај шестмесечен пациент. Експозето на д-р Митрев на тема „Хибридна процедура за затворање на голем мускулен вентрикуларен септален дефект кај 6-месечно новороденче“ е од особена важност заради можноста за примена на методот кај најмали пациенти и истата треба да послужи за едуцирање и пренесување корисни знаења за успешна имплементација на овој метод.
Привременото враќање на патната исправа во случаи на општо корисна работа и во случај на здравствена потреба е вообичаена постапка, кога надлежниот орган, во случајот Кривичниот совет при Основниот кривичен суд ќе најде разбирање за потребата. Во овој случај, иако станува збор за пренесување на знаење за здравствен проблем што може да спаси животи, молбата е одбиена како неоснована.
Покрај одземањето на патната исправа кај случајот на д-р Митрев се применети и други мерки на претпазливост, односно финансиска гаранција во вредност од 1 милион евра и уште 1,5 милион евра врз основа на побарувањата“, се вели во соопштението на клиниката.
