Украина побара од германската влада да ѝ испрати крстосувачки ракети Таурус додека Киев се обидува да се одбрани од руската инвазија која започна минатиот февруари. Барањето на Киев е добиено пред неколку дена, изјави вчера вечерта портпаролката на германското Министерство за одбрана.
Сепак, деталите од барањето, вклучително и количеството оружје што го бара Киев, остануваат нејасни. Пред неколку дена, Родерих Кизеветер, претставник на опозицијата од редовите на демохристијаните во германскиот парламент, го поддржа испраќањето на ова оружје.
Водени проектили со дострел до 500 километри ќе ѝ овозможат на нападнатата земја „да ја цели руската воена инфраструктура далеку зад линијата на фронтот“, рече тој.
Веста за барањето дојде откако украинскиот претседател Володимир Зеленски рече дека продолжува да бара поддршка од западните партнери.
„Ќе направиме сѐ што е можно и невозможно да ја забрзаме испораката на нови, поквалитетни системи за противвоздушна одбрана во Украина“, рече тој во петокот во видео обраќањето, додавајќи дека тоа е „буквално секојдневна тема во соработката со партнерите“. Украина постигнува побрз напредок во модернизацијата на својата одбрана отколку што можеше да се предвиди пред шест месеци, рече тој.
