Одобрувањето на Вашингтон за нападите на Украина врз Крим со западно оружје покажува дека САД не се заинтересирани за мир, изјави рускиот амбасадор во Вашингтон Анатолиј Антонов.
„Вашингтон целосно ги потчини членките на Г7 на својата волја во однос на конфликтот во Украина. Освен тоа, сериозно го зацврсти својот пристап за две важни прашања – испраќањето борбени авиони Ф-16 на режимот во Киев, како и безусловното одобрување. на удари врз Крим со американско и друго западно оружје. Ваквите чекори уште еднаш јасно покажуваат дека САД никогаш не биле заинтересирани за мир“, нагласи тој.
Антонов предупреди дека Русија ќе ги смета нападите врз Крим за „напад на која било друга област на Руската Федерација“ и ги повика САД да ги разгледаат можните одмазднички мерки од страна на Москва.
Рускиот амбасадор додаде дека Украина нема инфраструктура за користење на авиони Ф-16, ниту пак потребен број пилоти и сервисен персонал.
Според него, сето ова предизвикува загриженост за идното вклучување на НАТО во конфликтот, „кога американските борбени авиони ќе полетаат од аеродромите на НАТО управувани од странски „волонтери“.
На маргините на самитот на Г7 во Хирошима, американскиот претседател Џо Бајден му кажа на својот украински колега Володимир Зеленски дека САД и нивните сојузници ќе започнат со обука на украински пилоти за користење на борбениот авион Ф-16.
Претходно, американскиот советник за национална безбедност Џејк Саливан истакна дека САД и нивните сојузници ќе разговараат кои земји ќе испратат такви авиони во Украина, додавајќи дека Ф-16 не се на листата на приоритетни испораки за да се подготват за контраофанзивата на Киев.
Украина ги засили своите напади врз руски цели, особено на полуостровот Крим, кој Русија го анектираше во 2014 година.
