Ковачевски и Пендаровски да не кријат кои странски агентури стојат зад тензиите со Бугарија и антимакедонската пропаганда, ако не ги обелоденат, значи дека ги поддржуваат, велат од ВМРО-ДПМНЕ.
Претседателот Стево Пендаровски, по седницата на Советот за безбедност, кажа дека странски мрежи стојат зад говорот на омраза кон Македонија и негациите на државата и креираат тензии меѓу држaвите, а ако тој не излезе и не каже детали, се доведува во прашање неговата сериозност, но и се девалвира целиот систем, велат од партијата.
Потенцираат дека доколку власта не каже јасно кој стои зад тензиите, тогаш таа е активен чинител во истите. Доколку Ковачевски и Пендаровски не реагираат на негациите на нацијата и историјата, тогаш значи дека ги мотивираат таквите дејствија.
„Истовремено власта преку финансиските институции, треба да го испита потеклото на парите со кои се финансираат бугарските здруженија во Македонија, од каде често се слуша говор на омраза и негација на Македонија. Колку повеќе Ковачевски и Пендаровски молчат и не реагираат адекватно, толку повеќе се потврдува дека тие се мотиватор на антимакедонската кампања“, се вели во соопштемниието на ВМРО-ДПМНЕ.
Оттаму посочуваат дека никогаш претходно немало такви негации на Македонија од страна на Бугарија како сега, а Македонија сега ја води партијата која тврдеше дека ги затворила сите отворени прашања.
„Со сите изјави и ставови до сега власта покажа дека нема дно кое не може да го пробие. Иднината со оваа власт е неизвесна и понижувачка“, велат од опозициската партија од каде порачуваат дека “потребни се промени и нова влада“.
