На Нова година, најмалку осум европски земји регистрираа најтопол јануарски ден: Лихтенштајн, Чешка, Полска, Холандија, Белорусија, Литванија, Данска и Летонија, вели климатологот Максимилијано Херера, кој ги следи екстремните температури ширум светот.
Ова е „најекстремниот топлотен бран во европската историја“, изјави Херера за Си-Ен-Ен.
Во градовите кои често се покриени со снег, температурите се искачија на речиси нормално летно ниво. „Вистинско „чудо“ од ова топло време беше од 31 декември до 1 јануари“, изјави Херера за Си-Ен-Ен.
На 1 јануари Вадуц, главниот град на Лихтенштајн, забележа максимална температура од 20 степени Целзиусови, чешкиот град Јаворник достигна 19,6 степени, а Јодловник, село во Полска, забележа максимална температура од 19 степени.
Украина исто така забележа највисока температура во јануари.
Рекордните температури ги вознемирија метеоролозите, но помогнаа и да се олесни енергетската криза што го зафати континентот:
Цените на природниот гас во Европа скокнаа по руската инвазија на Украина, бидејќи претседателот Владимир Путин го ограничи снабдувањето на континентот и многу земји го намалија увозот од Русија. Но, овој невиден бран на топло време значи помала побарувачка за гас, а цените на природниот гас паднаа на најниско ниво од почетокот на руската инвазија минатиот февруари.
Невообичаено топлото време и помогна на Украина. „Поради топлото време, потрошувачката на (енергија) во Украина е намалена“, соопшти во вторникот државниот оператор за електрична енергија на земјата Укренерго.
„Путин сакаше да ги замрзне украинските сојузници и да ја победи Украина. Наместо тоа, дури и времето е на наша страна“, твитна Антон Герашченко, советник на украинската влада, на Нова година.
