Нема изградба на нови театри, кино сали, културно-младински центри, односно нема никакви нови капитални проекти во културата. Она што го има – е само реновирање на веќе постоечките. Ова го изјави министерката Бисера Костадиновска Стојчевска која не кажа што би се градело, туку само го повтори истиот одговор од претходно, кризата си го направила своето.
И додека ништо не се прави во културата, се ништи и она што е изградено. Срамнет со земја е споменикот на културата – објектот „Шар“, лоциран во Старата скопска чаршија. Кој дозволил да се урне овој објект кој се смета за културно наследство и што ќе се гради на негово место, одговор нема ниту министерката за култура.
- – Објектот „Шар“ е под надлежност на Управата за културно наследство, но тоа не значи дека Министерството за култура не е во тек со тоа што таму се прави. Исративме соодветна пријава до МВР и сега МВР треба да постапи за сега ние понатаму да можеме да видиме, да се преземат соодветни мерки во однос на тоа кој се осмелил да руши и да гради наново без никаква дозвола, додаде Костадиновска-Стојчевска.
Овој објект позади мене е срушен до темел, што ќе никне на негово место, за сега не се знае. На негово место никнува нов објект без да има табла со информации за градбата.
Дека објектот е срушен незаконски и без потребните дозволи, признава и министерката, и вели дека сето тоа било пријавено во МВР.
Според нормите, за ваквиот прекршок е предвидена кривична одговорност, велат од Министерството за култура. Управата, почитувајќи го Законот за културно наследство, ќе побара враќање на објектот во првобитната состојба.
