Риши Сунак ќе биде новиот британски премиер откако Пени Мордон најави дека ја повлекува својата кандидатура и му даде поддршка на противкандидатот Сунак.
„Нашата партија е нашето членство. Без разлика дали сме избрани претставници, активисти, собирачи на средства или поддржувачи. Сите ние имаме удел во тоа кој е нашиот лидер. Ова се времиња без преседан. И покрај компресираниот распоред за лидерскиот натпревар, јасно е дека колегите чувствуваат дека ни е потребна сигурност денес. Тие ја донесоа оваа одлука со добра волја за доброто на земјата. Членовите треба да знаат дека овој предлог е праведно и темелно тестиран. Како резултат на тоа, сега го избравме нашиот следен премиер. Оваа одлука е историска и уште еднаш ја покажува различноста и талентот на нашата партија. Риши ја има мојата целосна поддршка“, се вели во изјавата на Мордон.
Таа додава дека е горда на кампањата што ја водела и им се заблагодари на сите оние, од сите страни на партијата, кои и дале поддршка.
„Сите ѝ должиме на земјата, еден на друг и на Риши да се обединиме и да работиме заедно за доброто на нацијата. Има многу работа да се заврши“, додава Мордон.
Сунак ќе ја замени Трас, која беше принудена да поднесе оставка откако започна економска програма која доведе до превирања на финансиските пазари.
Мултимилионерскиот поранешен шеф на хеџ фондот ќе се соочи со еден од неговите најзастрашувачки предизвици, со задача да ја обнови фискалната репутација на Британија преку длабоки кратења на трошоците додека таа се лизга во рецесија, влечена од зголемените стапки на енергија, храна и хипотеки.
Тој, исто така, ќе претседава со партијата која во последниве месеци влегува од една криза во друга, длабоко поделена по идеолошки линии и во земја која се повеќе е бесна на однесувањето на нејзините политичари.
„Обединетото Кралство е одлична земја, но ние се соочуваме со длабока економска криза“, рече Сунак во изјавата со која ја објави својата кандидатура во неделата.
Риши Сунак првпат го привлече националното внимание кога, на 39-годишна возраст, стана канцелар на финансии во времето на Џонсон, токму кога пандемијата Ковид -19 ја погоди Британија, развивајќи шема за отсуство за поддршка на милиони луѓе преку повеќекратни карантини.
Неговото семејство мигрирало во Британија во 1960-тите, период кога многу луѓе од поранешните британски колонии пристигнале да помогнат во обновата на земјата по Втората светска војна.
По дипломирањето на Универзитетот во Оксфорд, тој подоцна отиде на Универзитетот Стенфорд каде ја запозна својата сопруга Акшата Мурти, чиј татко е индискиот милијардер Н.Р. Нарајана Мурти, основач на аутсорсинг гигантот Infosys Ltd. Работел и во Голдман Сакс како аналитичар.
