Сточарите се жалат на високи трошоци за храна што резултира со покачена цена на откупното млеко. Тоа пак предизвика повисоки цени на млечните производи. И покрај ограничената трговска маржа се најавуваат нови поскапувања, доколку државата не им помогне на сточарите.
Ако кравји кашкавал во октомври минатата година во маркетите можеше да се купи по цена од 299 денари за килограм, сега истиот кашкавал се продава по 577 денари или речиси двојно повеќе. Енергетската криза предизвика раст на цените, меѓу другото и на млекото и млечните производи, а синџирот на поскапување започнува со цената на откупното млеко.
Прилепчанецот Рубин Кузмановски 25 години се бави со сточарство. На неговата фарма тој има 50 крави и произведува дневно од 700 до 750 литри млеко. Откупната цена на млекото, како што информира тој, е покачена пред се поради зголемените трошоци за исхрана на животните. Според него, еден килограм концентрат за исхрана сега чини колку еден литар откупно млеко, односно 30 денари.
„Трошоците ни се зголемени од 60 до 150 отсто. Работиме едноставно само за да можеме да преживееме“, вели Кузмановски.
На неговата фарма се произведува и биено сирење, кое сега се продава по 450 денари за килограм, а пред кризата било за 150 денари поевтино.
Владата за да ги спречи ценовните шокови го продолжи рокот на траење на мерката за ограничување на маржата на основните прехранбени производи до 31 декември. Висината на трговска маржа за трајно кравјо млеко е до 10 отсто.
Но, ограничувањето на маржата не го спречува покачувањето на продажната цена на млекото и млечните производи, туку заработката на маркетите. Затоа на пример мешано сирење кое пред една година се продавало по цена од 316 денари за килограм сега е 415 денари.
Линк до целиот текст.
