Посветено работиме на ублажување на последиците од енергетската криза, тврди премиерот Ковачевски на денот кога цената на струјата порасна за над 40 насто за 24 часа.
,,Креираме амбиент за граѓаните и деловната заедница да може да постават најбрзо, наједноставно и по најповолни услови фотонапонски електроцентрали за производство на струја.
На денешната Владина седница поминаа измените и дополнувањата на Законот за градење кои ќе бидат доставени во собраниска процедура.
➡️ Процедурата која денес е усвоена на Влада предвидува фотонапонските електроцентрали да може да бидат поставени на објекти во индивидуална сопственост до 6 киловати и од страна на правни лица до 40 киловати;
➡️ Ги поедноставуваме процедурите и клучно е што на граѓаните нема да им биде потребно решение од општината за поставување на фотонапонските централи;
➡️ Со ова излегуваме пресрет и на бизнис секторот и на граѓаните, а помагаме на домашниот електроенергетски сектор;
➡️ Апелирам сите пратеници проактивно да се вклучат во носење на измените во Законот за градење, да ја донесеме измената и да помогнеме на граѓаните”, пишува Ковачевски во објавата до јавноста.
Најголем дел од граѓаните немаат повеќе илјади евра за инсталација на фото волтаици а мала е и временската рамка за нивно инсталирање пред почетокот на зимата и почетокот на кулминацијата на енергетската криза.
Никому не му е јасно зошто владата оваа мерка не ја донесе уште на пролет за досега да биде помината во Собранието и зошто мерките не се придружени со владини субвенции и банкарски можности.
Ковачевски пред да стане премиер бил дел од бизнисот со фотоволтаици.
