Кабинетот на претседателот Пендаровски сега тврди дека плочата за АСНОМ во манастирот Св. Прохор Пчињски за Илинден била од времен карактер и тој се согласил таа да биде тргната откако тој ќе замине од манастирот на Илинден.
Откако вчера expres.mk објави дека ја нема плочата поставена по триесет години на местото на одржување на АСНОМ сега власта тврди дека така било планирано. Досега никој не кажа дека плочата требало да биде тргната ниту пак сега некој објаснува зошто плочата треба да е тргната.
Голем број Македонци по Илинден повторно одат во манастирот за да се поклонат на плочата која сега ја нема.
,,Плочата за АСНОМ којашто беше поставена во манастирот Св. Прохор Пчињски за Илинден беше од времен карактер со цел да се реализира посетата на претседателот Стево Пендаровски и државната делегација, за прв пат по повеќе години, велат од кабинетот на шефот на државата по објавените информации во expres.mk дека плочата веќе ја нема на местото на чествувањето.
„Тогаш беше договорено во најбрз можен рок да се формираат работни групи составени од претставници од двете министерства за надворешни работи, министерствата за култура, како и од други државни институции коишто ќе ги утврдат начинот и формата за прослава на 2 Август, Илинден во Св. Прохор Пчински за наредната година. Целта на таквата формализирана соработка е да се воспостави институционална форма за одбележување на празникот Илинден во манастирот Св. Прохор Пчински“, наведуваат од кабинетот на Пендаровски од каде не даваат детали зошто плочата мора да се тргнува и да се става по потреба.
Игуменот на манастирот Св. Прохор Пчињски архимандрит Методије, за МИА потврдил дека договорот на двете делегации, македонската и српската, бил плочата да се тргне по прославата на Илинден, и повторно по договор да се става кога ќе треба.
Спомен плочата за одржувањето на првото заседание на АСНОМ на 2 август 1944 година, беше поставена на празникот Илинден во параклисот на манастирот Св. Прохор Пчињски каде што по долгогодишна пауза чествуваше македонска државнo-црковна делегација предводена од претседателот Стево Пендаровски. Од српска страна на одбележувањето присуствуваше министерот за надворешни работи на Србија, Никола Селаковиќ.
На спомен плочата двојазично, на македонски и на српски јазик, пишува: „На 2 август 1944 година на ова место е одржано Првото заседание на Антифашистичкото собрание на Народното ослободување на Македонија, каде народните избраници донесоа историски одлуки со кои се воспостави државност и самобитност на македонскиот народ изразувајќи ја својата определба да живеат заедно со народите на Југославија”.
Ексклузивно: Празно е местото од каде исчезна плочата во чест на АСНОМ во Прохор Пчињски
