Лидерот на ВМРО-ДПМНЕ Христијан Мицкоски со видео-обраќање ги повика пратениците на СДСМ да го одбијат францускиот предлог, а тој ќе поддржи опстојување на актуелната влада, па макар била таа и малцинска.
„Бидете достоинствени, почитувани пратеници од СДСМ и не потклекнувајте на притисоците од некои челни луѓе на вашата партија. Сакам нешто да се знае. Мојата цел не е борба за гола власт, туку првенствено заштита на државните и национални интереси преку отфрлање на процес кој е штетен за Македонија. И тоа треба да биде нашата заедничка борба во која треба да се обединиме сите на страната на народот и на страната на нашата Македонија.
Пратеници од СДСМ, вие отфрлете ја информацијата на Владата, а јас ви ветувам дека нема да барам избори и ќе поддржам опстојување на оваа влада, па макар било тоа и малцинска, само Македонија да не биде уценетата и понижена и да не се прифати она што сега ни се нуди. Мојата понуда е чесна и искрена и таа е водена исклучиво од интересите на народот и иднината на нашата Македонија.
Пратеници од владеачките партии, ве повикувам да застанете со нас, со народот на Македонија на вистинската страна од историјата. Гласно извикајте „Ултиматум, не благодарам“. Не робувајте на вашата партија, туку бидете како што доликува единствено во служба на народот! Вие сте на потег! Во оваа битка сме сите едно! Ви подаваме рака! – вели Мицковски во видео обраќање до пратениците на СДСМ објавено денеска.
