Лидерите на Г-7 беа пречекани од 4.000 еко-демонстранти кога слетаа вчера во Минхен во пресрет на клучниот самит за справување со Русија и кризата со трошоците за живот, објави Дејли мејл.
Светските лидери денеска ќе започнат преговори и ќе се обидат да го зголемат притисокот врз Русија, чии акции во Украина доведоа до недостиг на храна и енергија ширум светот.
Лидерите на Соединетите Американски Држави, Германија, Франција, Велика Британија, Италија, Канада и Јапонија ќе ги поминат следните три дена во алпскиот замок Елмау, а германски официјален претставник изјави дека веќе се одржале „многу конструктивни“ дискусии за можните ограничувања на увозот на руска нафта.
Околу 4.000 луѓе протестираа во градот во саботата, повикувајќи ги лидериte да преземат акција за борба против светската сиромаштија, климатските промени и гладот и да ја прекинат зависноста од руските фосилни горива.
Демонстрантите носеа плакати на кои пишуваше „Стоп за војната, Русија и САД / НАТО – рацете долу од Украина“ и „Империјализмот започнува овде“ и бараа Г7 да посвети повеќе ресурси за спречување кризи, управување со граѓански конфликти и економски развој.
Сепак, главниот фокус на учесниците ќе биде на тоа како да се справат со Русија и нејзината постојана инвазија на Украина без да се влоши инфлацијата, која во некои земји го достигна највисокото ниво во последните 40 години.
