Ако со Заев Македонија го допре дното, сега со Ковачевски го проби. Вчера македонската јавност беше сведок на досега невиден меѓународен блам. Вчера видовме како Димитар Ковачевски го надмина Зоран Заев во секој поглед во погазувањето на достоинството и дигнитетот на државата преку срам на јавна меѓународна сцена, изјави на прес конференција потпретседателот на ВМРО-ДПМНЕ, Владо Мисајловски.
Тој истакна дека не се само понижувачки зборовите со кои Македонија беше посрамена и навредена на меѓународна средба пред балканските лидери и германскиот канцелар, туку уште повеќе тоа што Ковачевски сето тоа го проследи со недоветно смеење и одобрување.
– Вчера кога го преставуваа како премиер на идна западна Бугарија, Ковачевски ако имаше грам достоинство ќе реагираше во одбрана на својата држава која ја претставува и за што зема плата од граѓаните, а не уште без врска да се смее и да се радува. Што има за смеење и радување господине Ковачевски? – прашува Мисајловски.
Тој посочи дека ако вака понизно и со измеќарски пристап реагира на јавни омаловажувања и понижувања на Република Македонија, тогаш е јасно дека Ковачевски нема кредибилитет и авторитет во меѓународните односи да ги застапува и штити македонските национални и државни интереси.
– Оваа вчерашна сцена само ја соголи вистинската слика за целиот сјај на бедотијата со која се води нашата дипломатија. Очигледно дека тие кои ја негираат и омаловажуваат и се мајтапат на сметка на Македонија се охрабрени затоа што спроти себе имаат политичари без кичма, со измеќарска ментална матрица кои немаат патриотско чувство, туку само болна амбиција и желба за власт. Ова однесување на Ковачевски е срамно и бедно, рече тој.
Мисајловски вели дека за ваквото навредување на својата земја тој должи не само извинување туку оставка, како чин на одговорност за срамот кој се нанесе на меѓународна сцена.
– СДСМ е таа која должи извинување за ова поведение на Ковачевски, но тие решија тоа да го бранат. Со тоа СДСМ решија да ја навредуваат интелигенцијата на своите граѓани. Ова кое што СДСМ се обидува да го направи е да го убедува народот дека тоа што некој го плука е всушност дожд. Доволно се порази, понижувања и и погазување на националното достоинство. Доволно се срам и неуспеси со оваа влада. Време е да се каже – премногу е! – потенцира тој.
Мисајловски истакна дека време е за протест за промени.
Народот на 18-ти јуни јасно и гласно ќе каже доста е за оваа власт на СДСМ и ДУИ, меѓудругото и заради овој срам кој го приреди Ковачевски. Време е за избори и нова достоинствена и просперитетна иднина за Македонија, изјави Мисајловски.
