Германскиот амбасадор во Приштина, Јерн Роде, изрази загриженост за најавената реконструкција на родната куќа во Митровица на нацистичкиот соработник Џафер Дева.
„Ова е култура на сеќавање на погрешен начин! Многу загрижен за плановите за реставрација на куќата на Џафер Дева, познат нацистички соработник/протагонист на злогласната СС-дивизија ‘Скендербег’. Без шминкање на историјата! Не ја искривувајте вистината за холокаустот или за воените злосторства извршени од нацистите и од локалните соработници #ЗаштитетеГиФактите“, реагира Роде на Твитер.
Од 5 ноември 1943 до 16 јуни 1944 година Дева бил министер за внатрешни работи на Албанија и во тоа својство на 4 февруари 1944 година го координирал масакрот на 86 жители на Тирана осомничени како антифашисти. Подоцна учествувал во регрутирањето косовски Албанци во 21. Вафен планинска СС-дивизија „Скендербег“, a во септември 1944 година, како лидер на Втората призренска лига, ги водел операциите против партизаните околу Призрен.
