Македонија индиректно ќе има свој претставник во финалето на Европското првенство во ракомет преку македонскиот зет Едуардо Гурбиндо, кој со Шпанија славеше над Данска со 29:25 и в недела ќе игра против Шведска, која беше подобра од Франција со 34:33.
Десниот бек Гурбиндо, кој е во брак со Македонката Елена Милева од Свети Николе, за нецели 15 минути во игра не упати удар кон противничкиот гол и имаше едно исклучување од две минути.
Покрај сопругата, со која е заедно веќе четири години, донеодамнешниот ракометар на Вардар од трибините во Будимпешта го бодреше и нивниот 10-месечен син Лиам, а тоа ќе го сторат и во финалето.
Покрај Гурбиндо, за „црвената фурија“ настапија уште двајца ексвардарци – Жоан Кањелјас беше втор стрелец во својата селекција со 7/11, а Хорхе Македа имаше ефект 2/6 во нападот.
Натпреварот го водеа македонските судии Славе Николов и Ѓорѓи Начевски.
